政情：EQ敗「象」早呈

藉口多多 被寸「賴地硬」

中華出入口商會（中出）尋日舉行傳媒蟹宴，象哥、中出副秘書長周浩鼎（Holden）等人都有出席。基於象哥同Holden都有民建聯身份，自然被問及黨友樹根及EQ落敗一事。象哥甫開腔就批評該黨區選部署失當，唔應該只重民生，無視政治牌存在；對於樹根區選落敗，象哥相對留有一手，只係話受主觀、客觀因素影響，相反講到EQ歸咎落敗嘅多個原因，象哥毫不留情批評對方唔好「賴地硬」。

象哥一開口批評就欲罷不能，借自己外號及EQ去非洲保育大象借題發揮，笑指EQ「救到我但救唔到自己」，明顯語帶雙關批評EQ只顧外遊而無時間爭取區內選票。

仲記得EQ於區選落敗後，為選舉失利列舉多個原因，一時批評政府興建插針式居屋，一時又承認無打反佔牌，今次象哥發功狠批，未知係咪對某人藉口太多睇唔過眼。但話雖如此，EQ本周會按原訂計劃，於立法會提出打擊走私野生動物嘅無約束力議案，似乎無論敗選與否，保育大象等野生動物都係佢重點工作之一。

黃定光叫吳秋北爭新東

另一方面，緊接區選嘅下一場選戰，就係明年二月底舉行嘅立法會新界東議席補選，象哥繼續為民建聯「吹淡風」，表明不贊成該黨派人爭奪，除非有信心明年九月於新東取得三席則另作別論。佢其後更提出反建議，認為工聯會應派人出戰新東補選，點名指工聯會理事長吳秋北應該「大膽啲」。眾所周知，象哥嘅太太，就係工聯會會長林淑儀，象哥呢個建議有心定無意，答案不言而喻！

同場成功由委任轉戰民選區議員嘅Holden，則大爆自己同象哥嘅未來動向，一方面表明自己考慮參選立法會俗稱「超級區議會」嘅區議會第二功能界別議席，一方面又指象哥將爭取連任進出口界議席，不過象哥今次就封口，對此無多加解釋嘞！