選舉開支從來都係豐儉由人，多名盛傳有意出戰明年立法會選舉嘅區議員，同樣於無對手情況下自動當選，但選舉開支卻大不同。有人前後只花費數百元就自動當選，而工聯會（工記）兩名「雙料議員」麥美娟（Alice）同郭偉強（阿強），埋單計數要花費逾兩萬元；至於民建聯北區區議員劉國勳嘅選舉開支約兩萬，但基於佢所屬政黨全額贊助晒，換言之佢一蚊都唔使自己出！
各黨派參選人於區議會選舉結束後陸續申報選舉開支，其中一批自動當選嘅區議員，選舉開支更係差異甚大，舉例指盛傳有意接棒出戰批發及零售界嘅自由黨邵家輝，整個選舉只係用咗七百多元，而新思維唯一自動當選嘅葵青區議員周奕希，合共花費七千多元，用得最多就係畀咗四千元請兩個人做選舉助理及拉票人。
至於Alice同阿強兩名自動當選嘅區議員，其中Alice合共用咗兩萬六千多元，最大筆開支用於廣告方面，用咗一萬八千多元整橫額、易拉架、五千張年曆卡等；阿強於選舉期間花費約兩萬元，當中用於選舉廣告最無手軟，用咗一萬七千多元，不過扣除工聯會贊助之後，兩人分別要自掏荷包四千多元及近兩千元。
卓妮