中環出更：不期「兒」遇兩母校師弟妹
香港律師會早前舉行一個討論私隱嘅活動，多名法律界人士都有出席，包括本身係大律師嘅個人資料私隱專員黃繼兒（Stephen）、法律援助服務局主席李家祥及立法會法律界議員郭榮鏗等人。Stephen上任三個多月，今次活動主題唔止開正佢熟悉嘅範疇，佢仲遇見兩間中學母校嘅師弟妹添！
當日活動有八十幾間學校參加，卓妮見Stephen同王肇枝中學及英華書院嘅學生傾得特別開心，學生仲排隊同佢影相，原來呢兩間都係佢母校。Stephen笑稱，佢中一至中五就讀王肇枝中學，中六預科就轉去英華書院。Stephen後來嘅發展都算唔錯，唔知會唔會激起兩間中學學生發憤讀書嘅動力呢？
公民教育委員會主席彭韻禧（Melissa）都喺現場，近日政府頻頻約見新當選嘅青年區議員，唔知佢使唔使見埋一份呢？Melissa笑笑口話，呢啲工作當然交番畀青年事務委員會做喇！佢最近忙緊跟隨「一帶一路」政策，同一帶一路沿線國家嘅領事館合作，透過展覽等活動令各界明白相關政策。
被問選立會否 何君堯：咁快
律師會前會長、候任屯門區議員何君堯亦有到場，對於今次當選區議員，佢都話好開心，第一步會先聽取居民意見，搞好區內工作。當問及明年會否參選立法會新界西直選、甚至俗稱「超級區議會」嘅區議會第二功能界別議席，何就睩大對眼話「咁快」，然後笑而不答行開咗。
卓妮