清潔運動當做騷 衞生問題怎會好

區議會選舉曲終人散,大家對結果滿唔滿意呢?有人話,區選係四年一度嘅政壇清潔運動,今次戰情激烈,睇嚟已經掃走唔少政治垃圾,咁真正嘅都市垃圾又點呢?好可惜,市民可以選議員,唔可以選官僚,官場充斥庸官劣吏,唔怪得香港愈來愈烏煙瘴氣喇。

嗱,為期兩個月嘅「全城清潔」運動啱啱結束,政府聲稱喺八個政策局及十九個政府部門合作之下,公共衞生情況已經大有改善喎。事實係咪咁呢?本報記者日前巡查全港多個衞生黑點,發現根本唔係呢回事。好似深水埗北河街街市一帶咁,後巷堆積食物殘渣、垃圾同紙皮箱,渠口淤塞,臭氣熏天,曱甴同烏蠅四圍躝,睇見都令人作嘔。其他地區亦唔好得幾多,佐敦新填地街有安老院門外淪為垃圾山,北角春秧街街市對出馬路變成菜渣收集站,葵青工業區多條街道更加淪為建築廢料棄置場,咁都叫做公共衞生有改善?講笑咩!

自○三年沙士以來,港府前後搞咗幾次全城清潔運動,但係每次都係成效不彰,甚至愈搞愈污糟,都唔知好笑定好嬲。最諷刺嘅係,早喺曾蔭權爵士任清潔大隊長嘅年代,當局已經將北河街街市一帶列為優先處理嘅衞生黑點,點知過咗十二年,依然仲係烏煙瘴氣,衞生惡劣,問你服未。

冇計喇,官場充斥人形垃圾,有乜法子唔愈搞愈污糟吖。正如立法會議員話齋,港府係就係經常舉辦清潔運動,但係次次都係當做騷,得三分鐘熱度,風頭一過就不了了之,咁又點會取得成效吖。一個城市就好似一個屋企,一定要日日打掃,如果學港府咁一年只係象徵式打掃兩個月,其餘十個月闊佬懶理,任由垃圾堆積,唔變垃圾崗至奇喇。好明顯,如果話衞生黑點十年如一日係港府胡混度日嘅見證,咁清潔運動淪為政治騷就係官僚敷衍塞責嘅證據!

唔係亂講o架,有食環署職員投訴,署方近年不斷裁減員工,令前線人手短缺問題瀕臨爆煲,六個蓋冚十個樽,影響工作效率。所以話,食環署管理混亂,人手不足固然係一個問題,而有啲員工偷懶蛇王更係家常便飯,喺咁嘅情況下,點可能解決垃圾問題吖。咪話功夫茶唔提醒,家陣全球面對各種疫症威脅,除咗禽流感同新沙士,仲有來勢洶洶嘅「世紀病毒」伊波拉,港府繼續懶懶閒,隨時重演沙士慘劇都似。

都係古人講得好,一屋不掃,何以掃天下。港府連清理垃圾咁簡單嘅事情都搞唔掂,何德何能管治香港吖。區議會選舉令激進勢力抬頭,政局勢必更加混亂,如果港府仲係得過且過,遲早好似垃圾畀人唾棄o架!