每年年底大家都會非常關注兩電來年電費加幅，同「大嘥鬼」有幾分相似嘅環境局局長黃錦星（星星）尋日出席電台節目時話，環境局已經收到兩電嘅建議加價申請，雙方正商討中，稍後會公布結果。咦？加價申請？港燈明明曾經宣布電費凍結至二○一八年，唔通出爾反爾？究竟係星星一時口快快講錯，定係鬼拍後尾枕呢？局長嘅新聞秘書其後幫手解圍，話大家一向都將加價理解成電費調整，局長講加價其實無特別意思，叫大家唔好諗太多喎！
