政情：選戰未衰夠 夢中「仁」被追殺
今屆區議會選舉塵埃落定，但對部分人嚟講，依家先係噩夢嘅開始。好似民主黨（白鴿黨）何俊仁（AV仁）咁，把口就話咁多年來無輸過區議會，今次終於一嘗落敗嘅滋味，但原來佢前晚先發夢被人「追劈」同箍頸，嚇到佢手舞足蹈咁抵擋敵人攻擊，仲驚動咗枕邊嘅老婆，以為半夜三更發生咩事添。唔通AV仁喺今次選舉得罪咗好多人，搞到發夢都要被人追殺？
AV仁喺今次區選中失落屯門樂翠選區議席，被問到夢境中係咪被主要對手何君堯及鄭松泰追斬，佢無正面回應，只係話夢境入面有好多人，最後更夢見有人箍住佢條頸，搞到老婆拍醒佢，先令佢從噩夢中掙脫。至於點解選舉過後先發噩夢，佢就話係因為選舉之後心情放鬆喎。
一舊雲「詛咒」黨友
當AV仁落敗兼夢見自己被人追斬之際，其黨友黃碧雲（一舊雲）似乎毫無悔意，事關白鴿黨喺九龍西幾乎全軍覆沒，尤其係一舊雲主打鉛水事件嘅啟晴邨，該黨竟然一席都攞唔到。雖然一舊雲承認地區工作做得唔好，但講開超級議席，佢就話除咗涂謹申之外，「其他（超級議席）都差唔多夠鐘」，大命嘅先唔死喎。