政情：泛民愛內訌 鬥到社福界
今個月除咗區議會選舉外，社會工作者註冊局（註冊局）亦正值選舉期，由本月二十日開始到下月十二日，讓註冊社工從廿三人中選出八名成員。呢場選戰關係到阻止註冊局「染紅」外，仲爆出泛民主派內訌，社福界立法會議員張國柱將會火併來自社工復興運動嘅浸會大學社工學系講師邵家臻，溫和派對戰激進派，十足詠春大戰洪拳，將註冊局變成選舉戰場。
註冊局由十五名成員組成，包括一名社會福利署代表、六名特首委任成員，以及八名註冊社工選出的代表。
溫和派遣八人應戰
以張國柱為首嘅香港社會工作者總工會（社總）尋日宣布派出八人應戰，務求全取八個社工成員席位。社總表示，希望阻止註冊局「染紅」，因為當局掌控社工續牌權力，擔心曾參與公民抗命嘅社工會不獲續牌。另外，註冊局亦有審批社工資格嘅權力，社總希望當選後能夠為當局把關，不准內地社工來港註冊執業。
邵家臻：測支持度
廿三位候選人名單之中，既有社總八名代表參選，亦有同屬泛民陣營參選，就係較為激進嘅邵家臻及學校社工鍾威龍，睇來傳統泛民與激進派嘅鬥爭已經蔓延到社福界之中！邵家臻明言，參選註冊局成員選舉係為測試支持度，見到老牌工會如此有鬥志派多人參選，都係開心嘅事。佢亦自稱與社總係同路人，只係角色上有分別。對比以往決絕否認參選立法會社福界選舉嘅態度，邵家臻今次就留有較大空間，只回答暫時未有決定。
其實社工復興運動曾經公開批評現任議員張國柱對前線社工支援不足，加上張國柱大病初愈，明年是否競逐連任屬未知之數，所以邵家臻參選爭奪其立法會議席都算合理推測。到底激進派能否成功於社福界突圍而出，就要等待下月註冊局呢場前哨戰嘅結果喇！