中環出更：搭Van駁政府車 曾蔭權勁鬼祟
涉嫌作出連串瀆職行為嘅前特首曾蔭權爵士，繼早前坐七人車去法院應訊時將椅背拉後「瞓低」疑避開記者拍攝後，最近又有傳佢為咗避開記者追訪，放棄一直乘坐嘅政府座駕，轉搭公共交通工具。原來傳聞真確，事關尋日朝早約七點半鐘，曾爵士被發現於畢拉山道住所附近，乘搭24M綠色專線小巴外出，忽然棄坐政府專用座駕，又無G4警員隨身保護，咁神秘究竟去邊度呢？
行蹤敗露 折返住所
據知該班小巴特別多乘客，而曾爵士就選擇坐喺司機後面第一排近窗口位置，實在唔容易發現其蹤影。當小巴轉出畢拉山道後，估計佢怕被人跟蹤，於是轉頭向後望，點知反而證實咗其身份。當小巴駛至祈禮士道附近時，佢突然落車，原來係轉乘預早喺該處等候嘅政府七人座駕，從後可見有G4警員為佢閂車門。
當曾爵士嘅座駕開車不久，可能發現行蹤敗露，於是兜兜轉轉經睦誠道返回畢拉山道住所，由佢上小巴至折返住所，全程只約八分鐘。曾爵士選擇早上七點幾鐘外出，慣常係前往教堂，但今次突然中途折返住所，莫非今次佢要去一啲特別地方或與一啲特別人士會面，所以要搭小巴掩人耳目？
卓妮