中環出更：「蓮」結婦女 扭轉弱勢
近年家暴個案屢次發生，一班熱心嘅名人早喺五年前成立心蓮心慈善組織，協助受家暴困擾嘅女性自力更生，重過新生活。心蓮心早前舉行籌款晚宴，卓妮見到已故全國政協副主席霍英東嘅女兒霍麗萍，佢大讚香港女性能幹，能夠兼顧家庭同事業，但佢亦建議要聚焦去幫助弱勢婦女。
心蓮心行政委員會成員管洪雪玲（Shirley）話，心蓮心成立五年仍然未有會址，係希望減少組織開支，所以現時仍未有搵地方嘅打算。Shirley每三個月就會落區探訪，佢話每次見到班婦女大膽求助，都會好感動。見到受助家庭小朋友嘅畫作，由黑白變為色彩繽紛、子女與父親由關係疏離到手拖手，更能鼓勵佢繼續助人，覺得工作極具意義。
心蓮心五周年 助逾四萬人
心蓮心創辦人何彭慧嫻（Patti）就話，家暴問題主要出現喺新移民、低收入家庭。Patti見過有婦女被丈夫打到骨折，甚至耳聾，發現好多婦女唔識求助，又怕報警會令丈夫入獄，會選擇吞聲忍氣三十年咁耐！Patti仲話，香港有唔少家暴個案存在，呢啲暴力行為唔能夠容忍，所以心蓮心特別關注呢班弱勢婦女，成立五年來已幫助過逾四萬名婦女。
卓妮同場仲見到保良局總理陳正欣與太太陳慕婷（Angel），Angel曾加入心蓮心幫助組織籌款，但依家忙於幫助丈夫工作而分身不暇，謙稱自己不如新世紀女性，未能家庭事業兩兼顧。Angel仲借心蓮心英文名Women Helping Women，取笑自己目前係Women Helping Men喎，認真識講笑。
卓妮