古人話，綿綿不絕，必有亂結，真係一啲都冇講錯。國泰航空嘅工潮平息無耐，點知家陣又死灰復燃，工會高調要求資方滿足包括加薪在內嘅四大訴求，否則唔排除農曆新年前發起罷工。斷估唔少市民嘅第一反應可能係：又來？國泰到底搞邊科，煩唔煩的吖！
係咁嘅，國泰勞資雙方即將就明年薪酬調整展開談判，工會列出四大訴求，包括加薪百分之六、檢討「紀律聆訊」制度、延長退休年齡至六十五歲及保險津貼加入旅遊保險項目。工會講到明，如果資方藉口多多，無視訴求，佢哋亦唔會坐以待斃，一於罷工咁話。資方暫時仲未有回應，淨係話繼續同工會保持溝通喎。
嗱，打工仔要求加人工好正常，至於幅度應該加幾多，其他訴求合唔合理，外界唔知內情，難以置喙。但點講都好，國泰作為本港主要航空公司，工潮唔單止係勞資雙方嘅事，仲分分鐘影響乘客嘅利益同埋香港作為航空樞紐嘅形象。係人都知，聖誕至農曆新年期間係出入境高峰期，唔少市民外遊或探親，亦有唔少遊客訪港，如果到時雙方仲傾唔掂數，真係爆發工潮，乘客大失預算，咁就好無辜咯。
話時話，國泰近年大小工潮不斷，好似生理周期咁發作，郁吓按章工作，郁吓示威抗議，搞到乘客無所適從，怨聲載道。大家應該仲記得，今年五月之嘛，工會因為加薪及福利問題同資方傾唔埋欄，靜坐抗議，差啲搞到暑假罷工，好彩資方喺最後一刻讓步，工潮先至平息咋，點知無耐又因為機師不滿編更安排，發起按章工作，簡直鑊鑊新鮮鑊鑊甘。你話嘞，勞資糾紛綿綿不絕，沒完沒了，唔係內部管理出問題都冇人信喇。
講起就唏噓，國泰以前係香港嘅名牌，仲多次當選全球最佳航空公司，好巴閉架。唔知點解，呢幾年國泰好似食錯藥咁，內部管理亂象叢生，服務質素每況愈下，旅客投訴如雪花飛嚟。淨係講超賣機票一瓣吖，一個機位賣多張機票，經常搞到頭等艙及商務艙旅客被迫「降呢」，經濟艙旅客就要等下一班機，係人都嬲喇。仲有不絕如縷嘅航空故障，雖然好彩冇發生重大事故，但嚇都嚇死人，咁就難怪國泰嘅國際排名每況愈下喇。家陣香港名牌就冇嘞，國際笑話就有份。
千年道行一朝喪，講嘅咪就係國泰呢種機構囉。旅遊業已經步入寒冬，萬一國泰真係又搞到罷工，盞衰多兩錢重嘅咋，唔該勞資雙方四四六六盡快拆掂佢，唔好添煩添亂吖。