政情：卿姐插平機會 明踩廢鑊
平等機會委員會尋日舉行年度論壇，匯報過去一年工作同加強與持份者嘅溝通，有約三百人出席，其中立法會議員劉慧卿（卿姐）就一於冇面畀，當住任期只餘下數個月嘅平機會主席周一嶽（廢鑊）面，狠批平機會係「無牙老虎」。
據知卿姐尋日大傷風帶病在身，仍然出席論壇表達意見。卿姐發言時話，市民擔心平機會只係「無牙老虎」，唔能夠處理好少數族裔、殘疾人士同埋性小眾權益。佢又話，平機會無權處理弱勢社群投訴，好多嘢都幫唔到佢哋，搞到佢哋生活依然困擾，其後進一步批評勞工處、教育局等針對少數族裔嘅支援做得太遲，認為佢哋為明年要向聯和國提交報告先急住做！
同場現身嘅廢鑊繼續厚顏死撐到底，聲稱依家對少數族裔嘅教育、就業等方面都有保障，只係未夠全面，並指平機會觀察到性小眾無保障先會做研究，反而呼籲立法會議員多發聲、提出動議辯論等，令公眾多理解問題喎。