政情：海嘯淹樹 誓再扎根

受到去年佔領行動影響及感染，今次區議會選舉有約五十名「傘兵」出選，加上今次歷史性新高嘅四成七投票率，唔少打滾地區多時嘅「雙料議員」，包括來自民建聯嘅樹根同葛珮帆，以及泛民嘅民協馮檢基同民主黨何俊仁都齊齊遭到滑鐵盧，於區選落敗失去民選區議員資格，後兩者更鐵定喪失參與明年立法會選舉，俗稱「超級區議會」嘅區議會第二功能界別議席入場券。

網民開香檳賀落選

不過，以上四名落敗嘅「雙料議員」中，以樹根被擊敗引起網民最大回響，事關佢過去不時自創成語引起網民熱烈討論，佢突然意外落敗後獲網民「贈興」，有網民號召市民到樹根位於東區漁灣嘅辦事處開香檳慶祝佢落選，政圈分析更指樹根可能此後面對更多挑戰，包括會被黨內人士「逼宮」要求讓出明年立會議席，分分鐘變為「雙失」。

元老開到聲叫檢討

樹根黨友、立法會議員葉國謙尋日接受電台訪問時，唔知有心定無意，形容今次區議會選舉係一場海嘯，頂唔住就會受到摧毀，希望兩名黨友檢討落敗原因。曾於○三年區選落敗嘅葉國謙其後以過來人身份話，樹根下屆應該再喺同區參選，暗批樹根唔好以為市民經常喺傳媒見到自己「飄飄然」，強調幫助地區解決問題，先會得到選民支持咁話。

見慣風浪嘅樹根疑好快收拾好心情，尋日疑開期票，表明會喺邊度跌低，就喺邊度企返起身，似乎暗示四年後會於東區漁灣捲土重來，收復失地。正所謂「口講無憑」，樹根要重新贏取當區選民嘅心，睇嚟要坐言起行，以持之以恒嘅實際行動畀人睇到至得嘞！