中環出更：廠商會解囊 引「嶺」教育路
中華廠商聯合會（廠商會）捐助四百萬元畀嶺南大學設立專項基金，嶺大為答謝廠商會支持，特別將綜合資訊科技學習中心以廠商會命名，尋日舉行命名典禮時，廠商會會長李秀恒（Eddy）、永遠名譽會長施榮懷及會董羅台秦（Louisa）等人都有到場，嶺大校長鄭國漢等校方代表亦齊齊出席。
咪以為有重要儀式舉行就會事先「洗太平地」，Louisa發現校園一角嘅布告板上，張貼「鄭國漢下台」大字報，校方並未因為有大批外賓到場而進行清理，Louisa讚揚呢種互不干預嘅態度好正確。佢話，雖然依家大學生好激進，但係大家唔好為此勞氣，商界亦唔應該因此而唔捐助學校。
方平嘆兒時冇自修室
Eddy對此都有同感，仲話廠商會已決定未來三年分階段捐出三千萬元，支持香港專上教育發展，今次就首先撥出四百萬元畀嶺大，以支援該校基層學生及成績優異學生。
一場嚟到校園，大家不期然諗起當年讀書時嘅趣事。Eddy話，小時候屋企冇錢，讀書時一心想攞獎學金。最難忘係有一次參加書法比賽取得冠軍，收到一張五十蚊支票，開心到飛起，事關當年打工仔嘅月薪都只係三百元！
施榮懷及廠商會常董方平都有到場，佢哋對自修室、電腦室好感興趣。施榮懷話，讀中學時逢親考試前就會去自修室溫書，事關屋企人多嘈吵。不過佢見依家興以透明膠板做間隔覺得好奇，因為咁就可以望到隔籬，又點專心溫書呢？方平就感嘆話，自己讀書時代連自修室都冇喎！
卓妮