開講有話，行得夜路多，必有遇鬼時。前朝特首曾蔭權爵士捲入連串醜聞，廉政公署調查超過三年，早前終於落案控以兩項公職人員行為失當罪，搞到曾爵士連出入都要鬼鬼祟祟，好似坐靈車咁，簡直大吉利是。
即係咁，曾爵士嘅結局如何，仍有待法庭審判，香港實行所謂嘅司法獨立，任何人都唔可以隨便評論案情，否則分分鐘被指藐視法庭，後果可大可小o架。奇就奇在，喺呢個敏感時候，有「民主阿婆」之稱嘅陳方安生不甘寂寞，忽然蒲頭為曾爵士大吐苦水，質疑呢單案件拖逾三年，「點解要咁折磨人」；佢仲離譜到替人塗脂抹粉，話曾爵士「對香港非常有承擔，亦都有政績，大家可以有目共睹」，指傳媒追訪搞到佢「精神上壓力非常之大」喎。
嗱，呢啲咪就係九唔搭八囉。正所謂若要人不知，除非己莫為，如果行得正企得正，點會畀人「折磨」，又點會有「精神壓力」吖。睇嚟唔止曹操有知心友，港英餘孽更有大把同路人，咁算唔算係扯貓尾呢？
話時話，曾爵士究竟有乜政績，真係考起市民咯。佢禍港七年，不務正業，留低一大堆爛攤子，房屋問題、安老問題、教育問題、醫療問題、青年問題等等，導致社會不公，貧富懸殊，深層次矛盾愈演愈烈，害到現屆政府焦頭爛額，唔通呢啲就係政績？
俗語話，出得嚟行，遲早要還。曾爵士作為前朝阿一，唔止劣迹斑斑，仲惹到周身醜聞，可謂咎由自取，與人無尤。香港有新聞自由，傳媒作為社會第四權，監察官僚操守，伸張社會公義，係天經地義嘅事，反而民主阿婆胡言亂語，噏得就噏，先至係對市民最大嘅折磨。
當然喇，民主阿婆係乜嘢貨色，大家早就心知肚明咯。呢個飲英國奶水長大嘅餘孽，回歸前對洋人唯唯諾諾，從來不知民主為何物，回歸後即刻反轉豬肚，唔止「忽然民主」，仲以「香港良心」自居添，唔知嘅畀佢嚇死，知道嘅畀佢笑死。呢，只要睇吓民主阿婆經常勾結人稱「漢奸」嘅李柱銘去外國告洋狀，唱衰香港，就知道所謂嘅「香港良心」幾惡毒啦。正所謂，同是天涯墮落人，民主阿婆同曾爵士屬於同一貨色，唔怪得兔死狐悲喇。
正如有人話齋，曾爵士由一名推銷員做到特首，的確係獅子山下一大奇迹，可惜依家搞到一身蟻，吉凶未卜，可謂「Poor Guy」；至於民主阿婆咯喎，一把年紀仲要出來拋頭露面，興波作浪，簡直係「Poor嬤」喇！