正當澳門政府宣布又派錢嘞──永久居民每人九千元澳門幣，這已是澳門連續第九年派錢，而香港斯人獨憔悴，政府依然做孤寒鬼守財奴，此刻政務司司長林鄭月娥卻人到無求創意新，忽然推出「欣賞香港」運動，都唔知攞景定係贈興！
老朽不禁又要撫今追昔，想當年香港只有「奇迹」，社會和諧，歲月靜好，市民行為端正、殷實守法、仗義疏財、關心社會、重禮儀、不滋擾他人，所謂「獅子山下精神」，亦正正道出港人長期形成的自強不息、精明幹練，永不滿足的精神及永不言休嘅追求財富熱情……這些精神氣質，何須大聲吶喊要人家去欣賞？
「桃李不言，下自成蹊」，桃樹和李樹，對自己的美好不會宣傳；它們的花果，卻把人們都吸引到跟前。所以話，有麝自然香，使乜叫人欣賞啊！
睇吓當今的香港，妖氣沖天，社會撕裂，高官一味狂妄自大，廢噏當真理，有些話「天堂已為她留了位」；有些話「自己一個月電費只是百零蚊」──而其實搞環保一事無成，更被審計署狠批「大嘥鬼」！
又有搞教育的，明明唔得掂，仲厚顏話自己每個月睇三十本書或雜誌，四十年來從未放棄過，幾十年來睇書近萬五本，如此博覽群書，果然深明「讀書之樂樂何如，綠滿窗前草不除」，若然如此愛書成狂，理應出口成文，唔使講幾句說話都要照稿讀喇！
唉！欣賞香港？欣賞啲高官講咗當做咗？咁就一個月三、四十萬人工；欣賞香港原來真係有免費午餐──郵政署寧願蝕到嘔都免費派信？欣賞姑息養奸放縱淫媒？欣賞反中亂港有運行……一個妖獸都市，我欣賞佢日日係鬼節，今日你講咗鬼古未？