政情：「稀客」劉江華 現身鄉事活動
元朗錦田鄉十年一屆嘅酬恩建醮尋日啟幕，同時掌管新界事務嘅民政事務局局長劉江華亦有出席拜神儀式。劉江華過往出任政制及內地事務局副局長時，經常被揶揄唔出聲，依家出掌民政局，又遇鄉紳不滿佢唔多現身鄉議局活動，似乎對新界人厚此薄彼喎。
我哋問過鄉議局主席劉業強，劉江華有冇約佢哋見吓面，佢只係笑笑口話「依家咪見面囉！」不過，劉江華想補鑊都要等多幾日，皆因佢下周一晚就啟程去北京，分別同國家文化部部長雒樹剛及國家體育總局局長劉鵬會面，下周三晚先返港。
劉業強聞組黨 要問人哋意見
鄉議局前主席劉皇發（發叔）近日身體抱恙，大家都好關心佢目前狀況，大仔劉業強話尋日朝早先探過爸爸，仲笑言發叔心繫區議會選舉，話新界人唔可以失威喎。鄉議局年前曾經放風話要籌組新界黨，但一直只聞樓梯響，唔知剛上場嘅劉業強會唔會趁機重新組黨呢？佢就話呢啲要問吓其他人意見喎，唔通佢自己無意見嘅？