政情：拉布三子又掀一 「波」罵戰
財經事務及庫務局局長陳家強尋日出席立法會財務委員會會議，批評財委會效率低，因為開會時間增加，但完成審議項目反而減少，語重心長話希望議員善用時間。不過，話口未完，拉布三子就繼續發功，提出中止待續和休會動議，但佢哋就死口唔認拉布，仲話只係表達審計署報告指政府誤導立法會嘅意見。
其後審議開設副消防總長職位時，拉布三子又同財委會主席陳健波爆發罵戰！人民力量陳偉業（大舊）質疑陳健波有多重身份，作為保險公司高層得到唔少利益，陳健波忍唔住反駁大舊「多餘」、「撩人者賤」，係人身攻擊佢咁話，仲激動到宣布休會添。會計界議員梁繼昌就認為休會唔合理，仲嬲到拍枱，表示對陳健波好失望，認真好火！
陳健波事後話只係做番「真正嘅陳健波」，唔能夠當聽唔到歪理，佢話事後收到好多議員紙仔，提醒佢唔好中計，所以佢會鑲起紙仔提醒自己。