政情：民主阿婆 曾蔭權 同根同氣
前特首曾蔭權爵士在任期間涉嫌作出連串瀆職醜聞，上周五出庭進行交付審訊程序，但未等到下月中再上庭，曾經同佢共事多年，同樣係「港英餘孽」、關係猶如姊弟嘅「民主阿婆」前政務司司長陳方安生，前日忽然開聲力撐曾蔭權，指曾爵士精神上壓力非常之大云云。民主阿婆之前一直無為曾爵士發聲，依家忽然高調，莫非二人同聲同氣，互相扯貓尾？
曾就五區公投針鋒相對
民主阿婆前日忽然邀約個別傳媒茶敍，仲透露兩、三周前約咗包括曾蔭權爵士等一眾前行政局（現為行政會議）成員聚會，佢話席上不少成員都好同情曾爵士，仲勸曾爵士多啲出席聚會，有問題隨時搵佢哋傾訴喎。
民主阿婆更忽然「代言人」上身，自言同曾爵士一齊渡過難關及美好時刻，又指曾爵士對香港有承擔，政績有目共睹，其案件拖逾三年，除精神壓力非常大，仲受到連番追訪，質問「點解要咁樣折磨人」？追訪報道乃傳媒天職，既然被追訪都叫「折磨」，曾爵士過去治下七年，又有否反省過自己曾折磨過七百萬人呢？單係房屋政策拖累現屆政府覓地建屋「補鑊」，已罪大惡極！
不過，民主阿婆與曾爵士呢對「哎吔姊弟」嘅關係並非如眼前一刻般相親相愛，可以話時好時壞。民主阿婆於○一年提早辭任政務司司長，曾爵士冷手執個熱煎堆，執「家姐」二攤接任司長，其後「水鬼陞城隍」當選特首，及後一○年立法會補選引發五區公投，曾爵士表明與屬下問責團隊官員不會參與投票，變相杯葛補選，當時力撐五區公投嘅民主阿婆曾狠批曾爵士做法係「國際大笑話」，指未聽過有政治領袖會帶頭杯葛「合法」選舉，針鋒相對咗一段時間。
兩粒「舊電池」變糖黐豆
兩姊弟三年後又變番糖黐豆，本報曾經報道過二人約會成班港英「舊電池」食飯。現時兩粒「舊電池」一個官司纏身，一個到外國「唱衰香港」但被冷落，睇嚟佢哋都係同病相憐、牛衣對泣，難怪民主阿婆如此肉緊曾爵士呢位「哎吔細佬」喇！