中環出更：好友新任局長 「聰」匆叫增工地
正所謂「新官上任三把火」，香港工業總會主席鄭文聰（Daniel）七月接任後積極為業界發聲，除咗發表報告研究香港工業出路外，仲趁好朋友、創新及科技局局長楊偉雄新上場，搶閘建議香港要增加工業用地，包括興建新型工廈。香港土地問題嚴重，政府連搵地建屋都難，Daniel呢個建議睇怕考起新上任嘅楊偉雄喇！
港覓地事在人為
Daniel尋日首次以工總主席身份發表研究報告，佢話香港工業面對營商環境變化，尤其近日法國恐襲對接歐洲訂單嘅廠家來講，生意步入冰河期，本地工業人才斷層，以及缺乏工業用地供應等，都增加香港發展工業嘅難度。佢又提到香港有冇土地係事在人為，好似香港迪士尼樂園塊地都係搵搵吓就搵到，認為大嶼山或郊野公園周邊土地都可以發展。
既然工總咁多建議，撞啱楊偉雄尋日新上場，Daniel笑言成立創科局已經講咗三年，但港人往往將科技同政治撈埋一齊，依家工總終於搵到個對口「親家」表達意見，仲非常認同楊偉雄提出要促進再工業化，短期內一定會約對方出嚟慢慢傾吓。
卓妮