中環出更：「袁」來愛登山 「行」善未驚過
樂施會超級毅行者尋日又出動，今年共有一千三百隊、五千幾人參加，唔少商界領袖都去行埋一份，包括香港總商會總裁袁莎妮（Shirley）。Shirley話，平時有行開山，每次大約兩三小時，所以今年行兩條四公里路線都未驚過。佢喺外國讀大學時會踩單車代步，最遠距離試過穿州過省踩足十八英里，真係唔講得笑。佢話返香港後都買咗架單車，但覺得香港路面唔安全，所以都係得個擺字喎。
身兼籌委員會主席嘅行政會議成員陳智思（Bernard）就話，佢已行過毅行者四屆半。咁半屆係咩意思？原來係因為當年佢做緊保險界立法會議員時，有同事發起組隊玩吓，結果得佢同議員梁耀忠兩支公，兩人又冇一齊操過，最終以非正式隊伍參加，接力各自行五十公里，未能符合行完一百公里嘅要求，所以咪得半屆囉。
陳智思參賽總遇阻滯
Bernard又話，雖然每次參賽都準備充足，但都總有啲阻滯，唔係自己傷就係隊友傷，拖慢進度，又乘機奉勸大家要買定保險參賽喎。講開嶺南大學近日飽受國力書院風波困擾，曾任嶺大校董會前主席嘅Bernard話，相信管理層會適當處理，認為政府不應作出監管，否則會影響學術自由喎。
同場仲有史泰祖醫生，佢自稱有十年毅行者經驗，但已經老咗所以唔行喇，仲話尋日天氣天陰陰好似好舒服，但潮濕翳焗，比較難出汗，提醒參賽者要留意。講起行山經歷，史泰祖最難忘有次行到雙膝痛，隊友即時畀埋支行山杖佢，冇咗支杖嘅隊友自然行得更辛苦，兼且要「等埋」佢，令佢好感動喎！
卓妮