審計署報告揭發教育局未有善用空置校舍，包括有四成半校舍一直被丟空、有校舍停辦空置近卅六年；又揭發有收生不足嘅小學獲批三千多萬元改善校舍工程，點知竣工後一年即殺校，浪費公帑。立法會政府帳目委員會尋日召開閉門會議，決定就空置校舍展開研訊，委員之一嘅議員謝偉俊會後話，明白殺校政策造成部分校舍空置，但佢哋會追查教育局係咪浪費資源及「生人霸死地」。如果情況屬實，咁外號「吳得掂」嘅教育局局長吳克儉咪即係有份製造土地問題？
