政情：吳得掂又冇影 大輝爭認衰
教育局局長吳克儉（吳得掂）早前以私人理由，預告缺席立法會教育事務委員會喺本月底召開嘅TSA公聽會，畀全城家長鬧爆，並與委員會主席林大輝就公聽會日期互指不是。尋日教委會討論包括港大風波嘅大學管治問題，吳得掂又再缺席，立即畀泛民議員圍攻。
話說教委會尋日一共討論三個議題，依次為職業教育、資訊科技教育及大學管治，其中吳得掂親身出席完有關首項議題嘅會議後就走咗，將第二同第三項議題交由副手教育局副局長楊潤雄應付。多名泛民議員質疑吳得掂若非刻意迴避，就係缺乏判斷力。其中民主黨黃碧雲批評「佢大學又唔理，小學又唔理，即係咩都唔理！」
今次缺席非「私人理由」
不過，林大輝其後主動向委員表示抱歉，話自己早前得知吳得掂將缺席該部分會議時，並無強烈要求對方出席，加上會議已超時，佢決定腰斬該部分議程留待下次會議討論，然後再與教育局商討出席官員安排。咁究竟吳得掂去咗邊呢？原來係出席新加坡領事館一項向香港大學生頒授獎學金嘅活動，唔係為咗私人玩樂，今次算佢喇！