政情：再拓新局 劉待下屆
港府創新及科技局（創科局）經歷三年多拉布戰後塵埃落定，將於下周五成立，當大家以為開局嘅政治角力落幕之際，有傳部分政界中人擬重提把民政事務局「一分為二」，保留原有民政局外，新增專責文化藝術事宜嘅文化局，另外再次爭取設立「體育運動專員」（體育專員），專門整合體育事務及資源，不過文化局、體育專員重上議事日程似乎係一廂情願，事關民政事務局局長劉江華七月下旬上任至今，各方面都尚可兼顧；而今屆立法會只剩下不足一年任期，為免再掀起新一波拉布戰，預料最快下屆政府才係合適時機重新推動有關事宜。
人選問題 至為重要
隨着立法會財務委員會上周五通過創科局相關撥款，勾起部分政界中人當年於政府重組架構時，同時力爭成立文化局及體育專員嘅記憶，事有湊巧，工聯會立法會議員陳婉嫻（嫻姐）於報章率先撰文，稱創科局撥款通過後，政府下一個目標係推出押後已久嘅文化局。
嫻姐開宗明義力撐，政府必須成立文化局，認為以現時民政局嘅態度兼顧文化工作，係處理唔到文化及文創業界範圍嘅事；對於會否因增設文化局再次掀起抗爭，嫻姐認為最大問題係局長人選，一個熟悉文化藝術、受到各方認同嘅人係重中之重。
至於同樣石沉大海嘅係業界期待已久嘅體育專員位置，此事一直未有下文與業界暫未有合適人選有關；如果退而求其次，當局委任政務官做體育專員，又會惹嚟外行人管內行人嘅批評。
爭議課題多 難插隊
講到底，增設文化局、體育專員於三年前缺乏嘅條件，甚至係不確定因素，至今仍然存在；如從客觀政治現實角度出發，劉江華上任局長只有三個半月，公道地亦應該畀機會展現政治手腕，睇吓能否平衡各方持份者嘅訴求；而現屆政府只餘下約一年半任期，立法會嘅最後一個立法年度亦有好多具爭議課題急待處理，增設文化局等事宜留待下屆政府才處理，似乎較為合乎現時實際情況。