中環出更：新翁之喜 送禮有方
臨近年底婚宴特別多，唔少人都曾經為送甚麼禮物畀一對新人而費煞思量，早前汕頭商會會長葉振南（Stephen）娶新抱，唔少政商界名人都有捧場，講起送禮大家都覺得心意先係最重要。另有商界中人於特別日子送禮都會花心思，似乎都係想收禮者會心微笑。
當日出席婚宴到賀嘅有「新小巴大王」馬僑生伉儷、「玩具大王」蔡志明女兒蔡加敏與老公馬鴻銘、懲教署署長邱子昭、「K金大王」胡楚南及一班潮州商會「家己冷」劉文文、胡炎松及張詩培等人，其中馬僑生伉儷話，依家好多人喺結婚前，都會同朋友講定想要啲乜禮物，仲會列埋一個清單出嚟，方便又直接。
馬僑生贊同設禮物清單
對於早前網上有類似清單被指「獅子開大口」，馬僑生伉儷話未見過，覺得通常新婚朋友都係需要小型家電或擺設等，唔會太過分，認為整個禮物清單畀朋友認頭呢個主意唔錯，禮物唔會重複嘅同時，又唔使驚對方會唔鍾意。
談及婚宴以外嘅送禮心思，觀瀾湖集團主席兼行政總裁朱鼎健話，早排女兒出外讀書，但撞正自己要出外公幹趕唔切送機，因此派出太太送女兒去外國，佢事後趁太太回程當日，就一早買咗一束花去機場接太太機，太太當然諗都冇諗過清晨五、六點一落機，就見到佢傻更更拎住紮花，喜出望外笑不停，立即用手機影低呢個場景。
講返今次婚宴，身為主人家嘅Stephen話，這一日對佢意義重大，除咗係兒子葉家麟成家大日子，當年今日仲係佢攞到現時代理啤酒品牌嘅日子，同年仲係兒子出世嘅重要時刻，佢又希望快啲抱孫，Stephen嘅兒子聽到唔知有無壓力呢？
卓妮