一波未平，一波又起。香港大學副校長任命風波仲未平息，又爆出連串洩密風波，搞到滿城風雨，睇嚟港大嘅校訓應該由「明德格物」改成「失德格鬥」至啱！
嗱，繼港大學生會會長公開大爆校委會會議內容，再有內鬼偷錄校委發言，然後交畀傳媒播出街，港大校委會好似被人剝光豬咁，乜嘢私隱都冇晒。鑑於事態嚴重，校委會除咗報警求助，而且向法庭申請禁制令，禁止傳媒發布包括錄音在內嘅校委會會議資料。不過咁，反對派就揚言會向法庭提出反禁制，話洩密內容係維護公眾知情權喎。
咁都得？洩密已經破壞制度，偷錄發言更加唔道德，而且有違法之嫌，依家仲要振振有詞，呢個究竟係乜嘢世界吖？反對派經常站喺道德高地，批評呢個唔夠光明磊落，嗰個違背民主原則，其實最唔光明磊落、最唔符合民主原則嘅就係佢哋自己。唔係咩，有人口口聲聲話校委會否決副校長人選係政治干預，但佢哋千方百計逼校方就範，咁唔係政治干預又係乜吖？正所謂，國有國法，家有家規。無論有乜嘢崇高理想，爭取民主又好，爭取自由又好，都要講法律、守規矩（口架），如果以為真理在手就可以為所欲為，何止港大雞犬不寧，成個香港都會永無寧日吖！
講真，邊個做港大副校長，大多數市民根本唔關心，大家最關心嘅係港大百年校譽及基業能唔能夠保得住。係人都知，港大近年被政治入侵，教授不務正業，學生醉心街頭，國際排名已經跌跌不休，如果連規章制度都冇人遵守，想唔沉淪都幾難。咪以為洩密係小事吖，校委會會議保密唔止係一種協定，更加係港大傳統，一旦禮崩樂壞，莫講壯大發展，連能唔能夠有效運作都成問題吖。寧靜穩定嘅環境對大學教育至關重要，今日港大淪為政治戰場，內鬥不斷，風雨不休，呢班人究竟係「守護港大」，定係「摧毀港大」，大家有眼睇，講多都嘥氣。
都係嗰句喇，大學係社會嘅縮影，港大烏煙瘴氣，咪就係香港沉淪嘅寫照囉。反對派將洩密醜聞講到大義凜然，同去年佔領之亂時有人聲稱「不守法絕對不等同不尊重法治」嘅謬論一樣，都係顛倒黑白，妖言惑眾。咪話功夫茶唔提醒，法治係香港嘅基石，而守法就係法治嘅根本，如果連呢個最基本嘅原則都冇埋，香港遲早玩完嘅咋。
都係古人講得啱，法存則國安，法亡則國危。香港今日究竟係安定係危，睇港大就一清二楚喇！