政情：公民講場：吳得掂撐唔掂 第N次跪低

反對全港性系統評估（TSA）嘅聲浪愈嚟愈大，有家長喺網上發起全面取消小學三年級別TSA嘅要求，獲得唔少團體支持，惟外號「吳得掂」嘅教育局局長吳克儉仲死撐制度冇問題。不過話口未完，就有私立學校決定由本學年開始唔參加TSA，吳得掂尋日先肯承認TSA喺操作上出現問題，稍後會進行檢討。其實吳得掂已經唔止一次「跪低」，早前鉛水風波鬧得滿城風雨，佢就企硬拒為學校驗水，更指學校應教導學生正確飲水態度，後來咪又「跪低」為近千間幼稚園驗水。唔知佢要跪爛幾多算盤先至會醒定啲呢？