政情：內地學者諷泛民冇邏輯
「李漢奸」民主黨創黨主席李柱銘等人周不時去外國「告洋狀」，冀外國勢力關注香港民主發展，但對內地官員評論港事則反指為干預香港內部事務，依家連學民思潮召集人黃之鋒等後生仔都有樣學樣。全國港澳研究會理事兼深圳大學港澳基本法研究中心常務副主任鄒平學尋日出席一個《基本法》講座時，直斥此現象十分荒謬，認為點解內地唔能對香港事務發言，反而外國可以？
至於「西環治港」嘅講法，鄒平學批評「缺乏大格局」，認為依家香港冇改變政治制度及生活方式，香港區議會、立法會及港人治港仍存在，毋須過慮。至於早前中聯辦主任張曉明嘅「特首超然論」惹起爭議，鄒平學強調《基本法》係小憲法，法律地位低於中國憲法，若果香港係外國所言嘅「三權分立」，點樣體現中央權力？他又指港人經常話特首地位重要，雙普選可以解決特首認受性問題，但另一方面又話司法及立法機關監督及制衡特首權力好大，「邏輯搞不通」，反諷以此推論，其實特首一啲都唔重要喎。