泛民議員力撐港大學生會會長馮敬恩口頭洩密，但又批評偷錄港大校委發言事件唔道德，被轟持雙重標準。全國政協常委唐英年尋日出席電台節目時，怒斥今次偷錄校委行為「卑鄙」，「係卑劣過盜竊嘅行為」。不過，當被問及佢亦曾在二○一二年特首選舉中，大爆行政會議嘅機密內容時，他則推說「偷錄同披露保密文件言論係完全兩回事」，並聲稱自己已為洩密承擔責任。唔通佢已經被佔中發起人戴耀廷嘅「犯法後自首就符合法治論」感染，認為只要承擔責任就洩密都冇問題？
當年民望大落後嘅唐英年喺電視直播選舉論壇中，聲稱競選對手梁振英（CY）曾在一次行會會議上，提到香港遲早要出動防暴隊和催淚彈對待示威者。CY即場否認，唐英年即指着對方高呼「你呃人！」成為經典。
唐英年昨早話，保密制有助與會人士暢所欲言，但當年佢評估過後，認為事件涉及嘅公眾利益凌駕於行會保密制之上，因此決定公然洩密。問及馮敬恩大爆校委會閉門會議內容，牽涉嘅公眾利益係咪仲大過當年佢大爆行會機密，佢就話：「我唔識得評估囉。」