政情：大學校委 冇人敢做
自從佔領行動後，多間大專院校遴選領導層時陸續面對衝擊，由香港大學選副校長、浸會大學選校長以至嶺南大學委任校董，都引起唔少爭議。最近港大委任校委及中文大學委任校董，唔少學生及校友都質疑被委任人士係咪親政府及支持特首梁振英人士，驚日後會干預院校自主。唔少大學校董呻現時動輒得咎，感到心淡。睇嚟政府要搵人入大學校董會，只會愈嚟愈困難。
早兩日政府刊憲公布，委任港大三名新校委、續任紀文鳳為校委，又委任中大一名校董，以及續任鄭海泉為校董半年。其實港大校委會主席及中大校董會主席都夠鐘換人，政府遲遲未公布，好大可能就係因為近日社會對政府委任人選有意見。其中港大學生會甚至用過衝擊手法，阻止校委會討論副校長人選，依家就將矛頭指向盛傳接任港大校委會主席李國章或中大校董會主席梁乃鵬，話佢哋係親政府，有人更播出校委會偷錄聲帶，司馬昭之心路人皆見。
校方唔追究或「太仁慈」
講到大學生衝擊「第一滴血」，係今年五月浸會大學遴選校長嘅諮詢會，學生會不滿校方「黑箱作業」而衝擊閉門嘅遴選委員會，最後仲佔領會議室。
有浸大校董透露，當時學生衝入去會議室將門鎖打爛，又整爛防火門，目的係阻止校董離開，衝擊情節比港大更嚴重，呢啲行為早已構成刑事毀壞，只係校方決定唔追究，事後睇番可能真係太仁慈。另外，其實學生會一早已知道校長人選，事後睇返爭議都唔大，冇人話佢唔應該擔任校長，只係因為學生會換屆，唔知係咪佢哋溝通出現問題，新會長先至話黑箱作業而衝擊。
被指「尸位素餐」感無稽
聽講當日有遴選委員離開時，被指罵「尸位素餐」，實在係無稽，皆因委員既冇收錢，又開咗好多會，落力審議，質疑班學生知唔知乜嘢叫尸位素餐。佢慨嘆，愈嚟愈多獲委任大學校董嘅人，畀人扣帽子話係親政府，但佢哋其實都有個人意志，好多人都係以專業知識服務社會，咁講真係令人心淡咁話。