中環出更：旅業瀕危 蘇錦樑應對三幅被
內地旅客訪港人次連跌數月，本地旅遊及零售業都寒風陣陣，日前再爆一單旅行團客在港死亡事件，雪上加霜之際，業界人士都希望當局盡快補救，點知當局遲遲冇招。商務及經濟發展局局長蘇錦樑（Greg蘇）尋日出席活動時只係講吓舊料、數白欖，嘥晒救亡良機。
數「過氣」活動當做咗嘢
Greg蘇尋日出席一個活動，大家追問有冇打救旅業嘅措施，佢話，當局會加強打擊違規強迫購物嘅活動，又數埋一堆「單車賽」、「網球賽」，甚至「高爾夫球賽」嘅盛事嚟充數，話香港已有好多盛事喎！問題係呢啲活動都已過咗去。但係內地網民廣泛流傳「遊香港、小心被打死」、「不花錢就死」嘅負面說法，如果任由咁樣傳落去，假嘅都會變成真，首先受影響嘅係聖誕及元旦訪港旅遊市道，長遠更可能影響埋內地人到香港旅遊嘅信心。
呢個時候，當局最應該係撲火、撥亂反正，但係Greg蘇仍然咁淡定，只怕好快就蘇州過後冇艇搭，到錯誤認知根深柢固之後，真係救都嘥氣。
卓妮