中環出更：女童軍晚宴 一哥被爆秘密
香港女童軍總會日前舉行周年晚宴，卓妮見該會副會長王賜豪及警務處處長盧偉聰非常老友，原來兩人係中學兼大學同學。王賜豪大爆盧偉聰讀書時已經立志做警察，估唔到最後佢真係入呢行，仲做埋一哥添！
王賜豪話，當年有位生物老師上堂時稱，根據過往經驗，佢哋一班同學裏十個有三個可以做到醫生，點知盧偉聰就話唔做醫生，要做警察，令佢覺得好驚訝喎！講起制服團體，盧偉聰話當年佢都參加過幼童軍嘅前身小狼隊，但係中學及大學階段就冇再參加類似嘅制服團體，因為要專心讀書喎。
靚太勤運動 修身着制服
講番晚宴，總會總監李周美枝、晚宴籌委會主席戴胡美蓉、名譽副會長何芷韻及莎莎主席郭少明女兒郭詩慧（Melody）等人都有到場。李周美枝話，明年係該會成立一百周年，屆時將舉辦多場大型活動，包括於葵涌舉辦國際大露營、出紀念郵票等。佢話，現時小朋友多咗唔同類型嘅課外活動選擇，參加女童軍嘅學生少咗，佢哋會加多啲新元素及舉辦領袖訓練吸引學生參加。
卓妮見幾位靚太嘅制服間中先着一次，但係都仲咁啱身，梗要請教吓修身妙法。戴胡美蓉話，習慣一星期耍一、兩次八段錦，又會跑步三十分鐘鍛煉身體。Melody就話只係做運動唔夠，平時佢仲會搽埋消脂膏雙管齊下。講起世界衞生組織將加工肉列為第一類致癌物，Melody話，多年前已少食加工食物，加上為咗小朋友健康，都係食新鮮疏菜同肉類多。
卓妮