中環出更：立會廁所水浸EQ跣傷
最近力推器官捐贈嘅立法會議員葛珮帆（EQ），未知係咪太上心不斷「諗嘢」，尋日朝早竟喺立法會大樓內嘅女廁跣倒受傷。EQ話，立法會六樓女廁水浸，地面上有一大攤水漬，佢一不留神就跣倒，當時左膝跪地，所以留下瘀傷，又懷疑扭傷咗膊頭同腰骨。雖然傷勢唔算太嚴重，毋須送院，但EQ下午要去睇中醫，並進行針灸療傷。
為自己友辯護即彈起
EQ仲話，佢當時隨手拎一張白紙寫咗個「壞」字，並貼於女廁門外，避免其他議員同職員受傷。另外，人民力量議員陳偉業尋日朝早喺立法會續會時曾要求點算法定人數，又指保險界議員兼財務委員會主席陳健波「成朝唔見人」，要打電話叫佢返立法會開會。雖然EQ受咗傷，但仍然可以立即彈起身，反駁陳偉業嘅說法唔恰當，因佢較早時間曾經見過陳健波喺立法會。莫非EQ為自己友護航，已忘記痛楚？
卓妮