中環出更：聰口問搵邊個避墮電騙
慈善組織小母牛日前於科學園舉辦年度大型籌款活動「競步善行」，唔少城中名人都有參加，香港工商總會主席王庭聰都有到場做啦啦隊為參賽嘅家人打氣。講起近期騙徒手法層出不窮，王庭聰話平日一聽到可疑電話就會單刀直入問對方究竟想搵邊個，如果對方o依o依哦哦，佢就會直接收線。不過，佢有幾個朋友就試過被騙十萬、八萬元，都係因為關心朋友心切，結果不幸被騙。
杜振源望今年籌4000萬
小母牛香港籌款委員會主席杜振源就話，慶幸咁耐以來都冇聽過有人假冒佢哋去做慈善活動騙財，而小母牛向來有一班長期固定嘅善心支持者。不過，現時零售市道較差，佢希望今年籌款目標可達四千萬元，能與去年相若就好滿足喎。
同場仲有世界女子桌球冠軍吳安儀、香港壁球代表歐詠芝及歐鎮鉻、前高官葉澍堃一家大細、佳能高級副總裁鄧慶治及潮州商會會董張詩培等人。吳安儀話，雖然桌球唔需要跑步，但佢都會每日跑步練體力及耐力，因為一場桌球比賽往往可以打好耐，需要高度集中。歐詠芝及歐鎮鉻兩姊弟則隨時做足準備，話打壁球時都跑來跑去，一公里競步對佢哋嚟講可謂濕濕碎。
葉澍堃滿場影撐親友
至於葉澍堃當日就無落場，見佢拎住部相機逼喺記者堆中穿梭，原來佢要負責做攝影師，拍低太太、家人及好友起步嘅一刻，當然更重要係打氣支持啦！鄧慶治就話，其兒子忙住上海新店試業工作，新抱下月就係預產期，所以佢獨自捧場。
卓妮