今時今日，好多人都希望「贏在起跑線」，可以快人一步早佔先機，尤其係科技愈來愈先進，如果不思進取，原地踏步，隨時被人愈拋愈遠，連塵都冇得食。
有辦你睇㗎，港府口口聲聲重視創新科技，○八年已斥資逾二億元推行免費公共WiFi服務，係威係勢要打造「智能城市」喎，點知搞咗咁多年，仲係得個吉。當局聲稱WiFi熱點由原來五千個增加至一萬七千個，齋睇數字似乎唔少，實情又係點呢？
唔講唔知，時至今日所有郵政局及大部分交通交匯處仲未有WiFi覆蓋，真係令人難以置信。就算有免費WiFi服務，亦得個樣嘅咋，好似公立醫院咁吖，話就話其中六間醫院提供免費WiFi服務，但大部分只限於餐廳，你想喺急症室等地方上網咩？咁就難咯。
話時話，審計署兩年前已發表報告，批評免費公共WiFi服務發展緩慢，要求將服務擴展到郵局及醫院，點知港產官僚當耳邊風，到依家仲未有任何改善，問你服未。
講起真係失禮，香港發展免費WiFi服務起步比好多地方早，但咁多年來一直冇進展，搞到樣樣都落後於人。同南韓、新加坡及日本等先進國家比，香港固然輸足九條街，就算同內地城市比較亦遠遠不如。以北京為例，當地政府計劃今年底喺三百個地點提供免費公共WiFi服務，包括十七個客運站或公交站；而上海早喺一三年提供免費WiFi時，已覆蓋公交樞紐候客區及公立醫院，計劃五年後增至四千個地方；至於鄰近香港嘅廣州，未來三年所有公共交通及醫療機構都會提供免費WiFi服務。人哋後發先至，香港就原地踏步，你話醜唔醜怪吖。
老實講，香港豆腐膶咁細嘅地方，設置公共WiFi服務話都冇咁易，又唔係乜嘢高科技，究竟問題出喺邊呢？正如資訊科技專家話齋，只需設置一兩個訊號收發器就搞掂，安裝費亦唔高，港府搞嚟搞去得個吉，真正原因係：非不能也，實不為也。
冇辦法啦，港產官僚最叻就係吹水唔抹嘴，而且「官到無求膽自大」，連審計署嘅報告都可以當冇到，仲有乜嘢好講吖。難為當局仲話要成立創科局發展科技產業，睇嚟都係大隻講嘅喇，唔怪得立法會始終唔放行。最好笑嘅係，港產官僚仲話想要為國家「一帶一路」擔任「帶路」角色，呢啲咪就係夜郎自大囉。
正所謂，時間就係金錢，效率就係生命。當今世界互聯網發展一日千里，香港再唔急起直追，「贏在起跑線」分分鐘變成「輸在終點線」！