內地嚴厲反貪同奉行節約，嚴禁公款吃喝玩樂同送禮，令唔少內地宴會都相當簡樸，不敢再以大魚大肉、鮑參翅肚去宴客，但有時就慳過龍，菜式可以好嚇人。早前內地就有個重要宴會，上枱嘅食物真係估佢唔到，擺放咗盆「乾爭爭」嘅麵包，旁邊只有牛油，連湯都無滴。咁大魚都有條啩？有嘅，但唔係新鮮魚，而係罐頭之中嘅極品「豆豉鯪魚」，上菜時仲依稀見到罐頭嘅形狀添！
除咗上述兩味別有風味嘅菜式，我哋仲打探到，席上一個海鮮鍋都經歷幾多變遷。話說未奉行節約風之前，海鮮窩有鮑魚同海參，但近年就變成豬皮、蘿蔔同魚蛋呢啲港式街頭小食。
據聞有宴會獲邀人士表達意見後，今年終於成功爭取「魚蛋變蝦丸」，但豬皮同蘿蔔依然在海鮮鍋中浮沉唔肯走。到底點樣可以利用有限嘅金錢，變化出最美味嘅菜式？但咁嘅成本，睇怕連肥媽都未必變得出平靚正菜式喇！