中環出更：樹根拋書包 教精IT「後輩」
立法會議員鍾樹根以擅長自創成語見稱，估唔到佢仲係個電腦專家。立法會前日有個委員會討論有關截聽事宜，現任資訊科技界議員莫乃光及曾任科技界議員嘅單仲偕異口同聲質疑，一旦在電腦上安裝了間諜軟件就難以移除，莫乃光更笑言係咪要炸咗部電腦先可解決問題。樹根發言時急不及待「拋書包」，話最少有兩個方法可移除間諜軟件，包括直接移除或預先寫好一個可以自動解除軟件嘅程式。
手機跌落廁所冇有怕
樹根透露，佢一九七六年畢業後第一份工就在中文大學擔任電腦操作員，對於兩名現任或曾任科技界議員擔心不能解除間諜軟件，佢就笑笑口話：「我做IT時佢哋都唔知喺邊」。雖然樹根談及電腦科技時振振有詞，但原來佢早幾晚唔小心將電話跌落廁所，認真大意。點算好？他說不時將手機資料上載到雲端，不怕資料遺失，所以隨時可轉用新手機。他又指，即使九六年的行事曆，也可在雲端中找出來。其實雲端儲存已廣泛應用，唔係咩新科技。
樹根又話，佢依家嘅新手機係國產貨，又教大家內置電池嘅手機最危險，因為就算關掉電源，也不能排除手機仍在運作，隨時有被監聽嘅風險喎。
卓妮