中環出更：千人萬指創世績 印出濟公
繪畫活動經常舉行，但尋日就有團體喺維園舉辦「萬指千人印濟公」手指印畫活動，並創下健力士世界紀錄，成為全球最大手指印畫。卓妮喺場內見到主禮嘅民政事務局副局長許曉暉（Florence），講起用手指印圖案，佢話細個都有玩過，用手指印圖畫、用飲管吹墨水等勞作幾乎係必學，好玩又可以培養學生對藝術嘅興趣，印象好深刻。
東井圓佛會為推廣○六年成為國家首批非物質文化遺產的「濟公傳說」，宣傳濟公「無我利他、濟世為懷」嘅精神，集合二十三個團體包括中、小學約一千三百人一齊用拇指印出全球最大手指畫。Florence話，記得當年小學佢都試過用手指印咗隻青蛙同蓮葉，雖然兩者都係綠色，但佢就用唔同深淺嘅顏色完成咗。
蔣麗芸自嘆無繪畫天分
立法會議員蔣麗芸亦有出席，仲同Florence件衫撞晒色，佢就笑言自己無乜繪畫天分，睇就叻，畫就唔係好得喎，仲透露咁多年來都未攞過同繪畫有關嘅獎項，但佢特別鍾意研究有相機年代之前嘅畫作，可以了解畫中當年嘅故事。
同場仲有發明折光畫的倫敦奧運美術大展金牌得主林文傑（Dominic），原來佢同東井圓佛會創辦人林東，於十多年前在慈善活動上認識。講到創作大型畫作，Dominic話最難嘅地方係構圖，但佢畫開大型畫作，應該無乜難度。卓妮仲見到佢胞弟林文發，為今次活動見證人，身上戴住一條好特別嘅領呔，原來就係Dominic設計，嚟緊呢啲印有折光畫嘅呔及絲巾仲將會出售添，相當特別。
卓妮