自言「官到無求膽自大」嘅政務司司長林鄭月娥，日前在立法會發官威，批評議員要官員當眾飲鉛水係一種屈辱，難為有市民長期飲鉛水，如此刻薄、涼薄的言論，隨即被議員批評為「膽生毛但冇心肝」。曾以「妹妹」形容林鄭嘅行政會議成員兼立法會議員葉劉淑儀尋日就話，唔擔心飲一杯兩杯鉛水就會威脅身體健康，仲話如果佢喺現場，佢唔會介意飲鉛水喎。
葉劉尋日出席活動時講起鉛水風波，被問到官員被迫飲鉛水係咪好屈辱時，葉劉就話飲鉛水唔係大問題，佢本人唔會擔心飲一杯兩杯鉛水會影響健康，又話其實講嘅含鉛超標，真正危害健康嘅都係少數人，如果佢喺現場，都唔介意飲鉛水。不過，葉劉補口話唔知議員逼官員飲鉛水時嘅環境係點、係咪有人以粗暴方式逼官員，令官員覺得壓迫喇。
究竟公務員嘅士氣係咪因鉛水受到好大影響，曾經任保安局局長嘅葉劉話，回歸以來香港環境不斷政治化，所以公務員感到挫敗都唔係一朝一夕喎。如此看來，今次林鄭會否是借機會發官威，藉此另有所圖？