中環出更：盧寵茂勸馮敬恩循序漸進

香港大學校務委員會上月底爆發推薦副校長風波，校委之一、學生會會長馮敬恩會後大爆會上各校委發言，包括引述校委盧寵茂所言，引起唔少人質疑。盧寵茂尋日喺電台節目以書信形式同馮敬恩對話，認為港大確實需要隨時代改變及優化，但「循序漸進總比革命突變來得好」，唔知係咪想緩和對立氣氛呢？

盧寵茂話，好多人認為佢同馮敬恩存在好多矛盾，但其實兩人有好多相似之處，兩人都係港大學生，都唔喺香港出世，但同樣喺香港長大，又係中國人，有着共同血緣和基因，差異嘅只係時空。講講吓，盧寵茂就暗寸話，佢身為醫生專業人員，絕對唔會披露病人私隱。

佢又自爆，近日會接受膝蓋手術，取出鋼板，但佢唔擔心自己傷勢，反而擔心港大百年基業和名聲，認為係無數人經歷數代辛勤努力嘅成果，縱使佢一個走咗，好快就會有其他人加入，但如果制度崩潰，就算再經歷另一個百年，都可能無法完全修復。

卓妮