中環出更：名人捱餓撐扶貧
香港人普遍豐衣足食，但係仲有唔少人生活喺貧窮線之下。有團體趁尋日係聯合國「國際消除貧困日」，特登喺中午時分舉辦「一○一七唔食都得」，呼籲大家食少一餐體驗貧窮。好多城中名人都空着肚去撐場，包括新世界集團執行副主席鄭志剛（Adrian）、遠東集團創辦人邱德根太太邱裘錦蘭等人。邱老太講笑話，自己咁肥，食少一餐，幾時餓得壞吖！
Adrian自言一向支持慈善活動，亦經常忙到冇時間食飯，所以食少一餐嚟撐場都冇問題。提出「食少一餐」概念嘅鴻福堂集團執行董事司徒永富（Ricky）話，希望藉此引起公眾關注貧窮問題，今次活動只限於教會，冀明年可以推廣至全港，唔使一年得一日先食少一餐去關注貧窮。
司徒永富零食當午飯
講起捱餓，Ricky自爆經常食少一餐，因為工作忙碌，成日到四點幾先發現未食飯，所以索性食零食算數。Ricky更教導十三歲兒子關注貧窮問題，又同佢一齊助養兒童，佢認為父母唔應該將世界形容得過分美麗，要讓下一代認識真實世界，學習貢獻社會。
黃傑龍教囡囡關心社會
曾參與體驗貧窮節目嘅叙福樓集團執行董事黃傑龍（Simon）自言細個捱過窮，所以會關注貧窮問題。不過九歲囡囡出世時家庭環境已明顯改善，所以Simon要諗辦法令囡囡認識貧窮、關心社會，依家仲經常跟住佢做義工添！
卓妮