熟食中心淪人肉蒸籠
熟食中心抽氣全部「跪低」，檔戶及食客同入「蒸籠」！牛池灣熟食中心抽氣系統早前全數壞掉，場內「熱辣辣」令食客卻步，期間扶手電梯更出現故障，受影響的商戶質疑食環署管理不善致問題叢生。有立法會議員批評食環署將熟食中心外判卻欠缺監管，令商戶蒙受損失，促該署加強對外判承辦商規管。
「平日通風已經好差，近排仲無端端成個場嘅抽氣扇全部壞晒，煮嘢食啲煙冇得走，開咗爐嘅話我哋一行入廚房就標晒汗，依家都唔敢開晒兩個爐，驚會熱到火燭！」牛池灣熟食中心檔戶林先生指出，近日該處抽氣系統全數壞掉，令場地翳焗不堪，日常「開工」辛苦之餘，生意亦大受影響，「好多客都因為太熱唔敢上嚟食嘢，就算我晏晝唔開爐都有成三十幾度，生意比平時少兩成！」
入秋仍錄近35℃高溫
然而，日前記者往上址視察，即使已入秋，但以溫度計仍錄得近攝氏三十五度的高溫。
除抽氣系統，林又指上址問題多多，「呢邊個扶手電梯壞咗成半個月都冇人嚟整，樣樣嘢都係冇人理。好多熟食中心都加咗冷氣啦，我哋呢度好似孤兒仔咁，都唔知佢哋（外判公司及食環署）之間點溝通，管理好差，叫人點做生意！」
回應指機電署已訂組件
食環署發言人證實，過去兩年曾接獲一宗相關投訴，而該署於上月中分別接獲上址扶手電梯及抽氣系統故障報告，已即時轉介機電工程署安排維修；由於機電署需訂購新組件進行更換，有關扶手電梯及抽氣系統需暫時停用，期間機電署在熟食中心安裝臨時抽氣扇，而上月底已完成以上兩項維修工程。
發言人續指，一直有監察外判街市管理承辦商的運作，如發現管理不善，會發出塞責通知書。至於加裝冷氣，發言人則表示曾於今年初在上址進行問卷調查，惟因少於八成檔戶同意加裝空調系統，故未能進行相關可行性研究。
立法會食物安全及環境衞生事務委員會委員王國興批評，食環署在事件上責無旁貸，「電梯同抽風系統都係主要基本設施，食環署作為業主有責任維護，唔係佢哋根本冇辦法做生意。」王質疑事件中該署對外判服務監管不力，令商戶蒙受損失，認為外判制度亦會影響管理質素，「溝通同問責都隔多咗層，令商戶好易覺得投訴無門。」王促該署加強規管及督促承辦商，並制訂緊急維修及平常維修的時限，並應設立處罰制度，將無法兌現服務承諾的承辦商列入黑名單，以保障商戶及食客。
記者：呂諾君