阿里巴巴老闆馬雲最近表明，將效法巴菲特、蓋茨等超級富豪，到八十歲時會捐晒成副身家，引發熱議。雖然話普通人冇財可捐，好難學人哋同國際接軌，但唔緊要，身後捐贈器官，遺愛人間，實行另類「裸捐」，一樣咁有意義o架。
呢，十九歲求肺少女等唔到移植而不幸離世，令社會再次關注器官捐贈問題，食物及衞生局局長高永文尋日話喎，當局唔排除參考外國做法，如果一個人生前並無反對，死後器官可用作移植，但就要先同專業界別人士商討，並了解市民接受程度以及政府宣傳教育係唔係足夠喎。
咪話功夫茶潑冷水，呢種所謂「選擇不捐贈」（opt out）嘅模式，睇怕都幾難喺香港實行。高局長自己都識得講啦，市民未必接受吖嘛。你知啦，中國人死留全屍嘅傳統觀念仍然根深柢固，即使後生仔女接受，老一輩亦未必同意，唔少個案就係死者生前願意捐贈，無奈因為家屬反對而作罷，喺咁嘅情況下，即使勉強推行，引發爭拗，添煩添亂唔在講，效果亦好成疑問。新加坡推行「選擇不捐贈」制後，捐贈率不升反跌，就係最佳例子嘞。
唔講唔知，原來立法會九九年已經討論引入「選擇不捐贈」制，可惜最後都係不了了之。真係唔知好嬲定好笑，當年負責解畫嘅衞福局官員，講嘅嘢幾乎同高局長一模一樣，又係話市民唔接受，又係話當局會加強宣傳，結果十幾年過去，社會風氣唔見得有幾大轉變，官老爺到底有冇做好自己份工，畫公仔唔使畫出腸喇啩。
當然喇，講一千句漂亮話，不如做一件實事。移風易俗呢家嘢，宣傳固然重要，高官以身作則更加唔少得。好似中國人傳統興土葬，但喺內地歷代領導人帶頭簽字火葬嘅號召下，觀念已經徹底改變。話時話，香港九成九都係火葬，所謂留全屍根本無從談起，反而捐贈器官，既可以救人一命，亦可以延續自己生命，直頭係一家便宜兩家着。
所以話啫，榜樣力量真係無窮o架。唔單止火葬，好多內地領導人死後都將遺體捐作醫學研究用途；前英國首相戴卓爾夫人生前亦講過要捐贈器官，據聞呢個亦係戴安娜王妃臨終前嘅遺願。至於近啲嘅，馬來西亞總理納吉布日前公開承諾成為器官捐贈者，多位內閣成員跟進。嗱嗱嗱，呢啲就係國情同國際標準，官老爺們識做喇！
講多無謂，行動最實際，捐贈器官，由高官做起，反正港產官僚最鍾意「發揮餘熱」，身後「裸捐」就合晒佢哋合尺喇，係咪？