特區政府扶貧政策靠篤數，夠膽死話本港貧窮人口及貧窮率係六年來有紀錄新低。事實上，數據背後只因福利開支急升；玩數字遊戲，其實無助解決本港人口急速老化，貧窮長者只會持續惡化！講真，去年本港非綜援在職貧窮人口有四十六萬人，當中有一萬二千在職貧窮人士更擁有學士學位。
事情反映政府扶貧最終得兩個字──失敗！而另一方面，亦反映大學學位不值錢！香港貧窮情況，原來有四種計法：第一，在沒有任何政府援助介入下，全港貧窮人口達一百三十二萬；第二，在計算綜援、長者生活津貼等恒常現金支援下，貧窮人口就減至九十六萬；第三，九十六萬名接受現金支援嘅貧窮人口，加上政府「派糖」等一次過紓困措施，貧窮人口減至八十九萬人。
最後一種計算方法令人更有「驚喜」：進一步計算其他政府的恒常非現金支援，主要為公屋戶，貧窮人口就會減至六十五萬人！
阿哥，女人就話唔同日子有唔同嘅需要，而政府要祭出亮麗政績，原來亦可以有唔同嘅「數據」，窮戶呢頭可以少幾萬人，之不過，貧老嗰頭又添多好幾萬人。此「朝三暮四」之把戲而已！政府要扶貧，又唔肯攞出誠意，一個全民退休制度，叫學者研究完又棄而不用，之後又再提出全民退保要再諮詢半年，安老問題明明迫在眉睫，可政府一於歎慢板，死唔斷氣，搞到成個社會浮躁不安，卻安慰自己：貧窮人口出現新低！
「一國兩制」冇錯係鄧小平嘅天才設計，之不過佢老人家做事，最忌拖拖拉拉，佢多次說過：含糊其詞不行，解決不了問題；辦事要快，不要拖！而特區政府卻愛每事拖，在不斷諮詢下蹉跎歲月，全民退保會喺第幾任特首下開花結果呢？你問我──我問邊個？