政情：董耀中撇唔甩旅議會
旅遊業步入寒冬之際，監管香港旅遊業界操守嘅旅遊業議會亦就快有人事變動，旅議會主席胡兆英同總幹事董耀中呢對「孖寶」即將拆夥，前者出任主席滿六年夠鐘無得留低，於今年十二月初卸任，到時會選出新主席；今年六十六歲嘅董耀中原本一一年已退休，其後因總幹事一職請唔到人，佢被游說再坐多陣，結果年復年，今次已經係第三次續任總幹事，任期直至一七年底。
據了解，董耀中走極都走唔到有內外因素存在，內在原因係旅議會唔想主席同總幹事同時換人，影響交接工作，而外在原因係同政府將成立旅遊業監管局有關，事關旅監局將取代旅議會監管旅遊同業發牌及懲處工作，有意見指旅議會喺呢個過渡時期預料難以請人。
等旅監局成立先走得
另一方面，據聞董耀中今次再獲續任，理事會講明其任期係到一七年十二月廿三日，或議會停止執行業界監管職能一天為止，兩者以較早者為準。不過話時話，旅監局係咪可以於一七年成立，只有天知曉喇！