政情：血肉城牆 財會護波

力爭委會「五主一副」

建制派六名獨立議員包括商界廖長江、體育、演藝、文化及出版界馬逢國、建築界謝偉銓、旅遊界姚思榮、星爺同波哥今年正名為「六人組」。佢哋有感星爺做財委會主席時因為無後援，搞到主持會議時多次被泛民包圍，所以決定諗諗計，以免重蹈覆轍。佢哋就留意到，泛民每次行動都諗過度過，而建制派就好少有部署，搞到一遇到突發情況就應付唔嚟，所以佢哋傾好，如果今個會期再出現類似情況，就算築起人牆都在所不惜。

「六人組」一向比較低調，今次除咗決心「護波」，仲計劃喺新一個會期多啲發聲，改變外界對功能界別嘅印象。佢哋第一步行動就係爭取「五主一副」，即係喺各委員會上取得五個主席、一個副主席職位。而根據建制派內部協調，廖長江會做司法及法律事務委員會主席、謝偉銓就做發展事務委員會主席、星爺做財經事務委員會主席、波哥做財委會主席、馬逢國同姚思榮就分別做人事編制小組委員會主席同民政事務委員會副主席，的確係可以囊括五主一副。不過，由於馬逢國當選內會副主席，令人事編制小組嘅主席位出現變數。

人事編制主席多選擇

馬逢國坦言好難同時兼顧內副同人事編制小組主席職務，已經將人事編制嘅位交番畀協調一方。據悉建制派嘅人選就有議員謝偉俊、黃國健同做過人事編制小組主席嘅葉劉淑儀。葉太就話，佢無諗過爭做主席，但如果要幫手佢都無所謂喎。至於最終花落誰家，明日就自有分曉。