中環出更：張俊勇戒食牛 愛心美膚
唔少香港人都鍾意食潮州菜，好似潮州牛丸、芋泥餅等都好受歡迎，咁啱香港潮屬社團總會（總會）早前一連多日喺中環遮打花園舉辦「香港潮州節」，一班潮州「家己冷」趁住呢個活動聚首一堂，其中總會常務會董張俊勇透露，由以往好鍾意食潮州牛丸，到近年完全無食牛肉嘅經過；另有人則憶述由細個唔識食部分潮州美食，反而長大後見到就流晒口水！
張俊勇出席活動後表示，自從三年前返內地食和牛時，突然感覺到隻牛好似喊緊，之後就完全無食牛肉，依家連紅肉都戒緊。佢又話，以前面部經常泛紅，自從無食牛肉後，情況得以改善，笑言皮膚仲好過太太添。
自稱並非大男人
當問及潮州男人予人印象係「大男人」，張俊勇話呢個係外界普遍嘅誤解，又以自己為例，屋企以往都係由嫲嫲話事，加上佢依家屋企有兩個女同兩名女傭，名副其實係一屋女人喎。
總會嘅財務部主任林宣亮透露籌辦今次活動不為人知嘅一面，原來佢哋一行廿多人事前特意去潮汕試食，揀選標準以衞生及特色為主。林又認為，潮州話都有獨特之處，譬如女人嘅讀音係「美姿娘」，畀人嘅感覺比較溫柔。
同場仲有汕頭商會會長葉振南、總會會董陳光明及康泰旅行社董事總經理黃進達。對於最近一名少女因等唔到合適肺臟移植而離世，黃進達自言好支持器官捐贈，亦知道身邊好多年輕朋友都填咗器官捐贈卡，強調要小心向家中長輩交代，始終年輕人同長輩嘅思想有啲唔同。另一總會成員林月萍亦填好晒器官捐贈表格，希望可以幫到有需要嘅人。
卓妮