有人話，生意成功者，至少有一項過人之處。同樣道理，香港郵政年年蝕到趴街，失敗原因肯定唔止一個，好似管理不善、蛇王成風、經營無方等等，都係導致業績低落嘅成因。嗱，淨係濫發特別版同紀念郵票，已經浪費唔少公帑喇。
話說香港郵政為咗掠水，近年不斷濫發特別版同紀念郵票，可惜銷情欠佳，貨尾堆積，搞到要當垃圾丟棄，一三年至今年年中合共銷毀一千一百萬枚特別及紀念郵票、小型張及首日封等相關郵品，涉及印製成本七百六十萬元，直情係倒錢落海喇。
點解紀念郵票會滯銷？原因好簡單，咪因為濫發無度囉。物以罕為貴，紀念郵票貴精不貴多，偏偏郵政官僚好似發錢寒咁，近年不斷濫發，以前平均每年發行七至八套，依家一年出十幾套，導致冇晒升值潛力，唔賣剩蔗至奇喇。郵政賺錢不成，反而浪費公帑，你話係咪唔衰攞嚟衰吖！
咪以為郵品賣唔出只係蝕錢咁簡單吖，紀念郵票淪為垃圾，一來浪費紙張，糟蹋地球資源，二來增加堆填區壓力，加深「垃圾圍城」嘅危機，害人害物。環保團體就批評得啱嘞，香港郵政有多年發行紀念郵票經驗，預測郵品銷情就算唔係十足，都應該估到七、八成，結果照樣不斷濫發，不斷浪費，令人匪夷所思。試諗吓，如果浪費嘅公帑由郵政官僚自己埋單，佢哋仲會唔會咁不負責任呢？
話時話，郵政烏煙瘴氣，醜聞多多，浪費公帑已經唔係新聞嘞。審計署曾踢爆，郵政對本地郵資不足問題一直闊佬懶理，搞到郵政要急急補鑊加強抽檢郵件，話就話每月追回幾萬元欠資，點知每月額外花費嘅員工加班補貼就高達百萬元，妹仔大過主人婆，簡直係笑話。正如有人話齋，追討欠資係郵政人員分內事，最後竟然變成賺取OT嘅「外快」，郵政官僚一味搵公帑着數，洗腳唔抹腳，唔怪得年年見紅喇。
最離譜嘅係，香港郵政唔止年年虧蝕，而且頻頻「失信於民」，淨係舊年就遺失本地及海外郵件七千三百幾件，賠償金額超過二百萬元，甚至試過八日內三次遺失郵袋，問你怕未。
講到底，最應該被送去堆填區嘅唔係賣剩蔗嘅紀念郵票，而係爛到入心嘅香港郵政，日後如果發行一套紀念香港郵政壽終正寢嘅特別版郵票，肯定大受歡迎！