政情：趙振國促零售業改善服務
零售業步入寒冬，經濟下滑及反水貨客等趕客行動被視為主要原因。有「假髮大王」之稱嘅品牌總商會會長趙振國認為，香港曾經係聞名嘅購物天堂，但今時今日香港零售業喺價錢、服務質素等方面已失去競爭力，才是致命傷。
香港未有與時並進
曾經留學日本嘅趙振國係「日本通」，幾乎每月都要去一趟日本。佢話近年日本旅遊業由谷底反彈，除咗因為匯價下跌令貨物價錢變得相宜之外，日式親切嘅服務文化亦係日本受歡迎嘅原因，香港好快就被比下去。
講到最近有官媒以八達通批評香港科技落後、發展停滯，趙振國認為，香港喺多方面確實未有與時並進，好似外國大企業早已利用大數據分析客戶嘅消費習慣，用以改善產品或服務，但香港業界喺呢方面就顯得好落後。
不過之後問佢有冇應用大數據科技喺佢盤假髮生意呢？佢笑笑口話有喎，但詳情就要賣吓關子喇。