政情：屈得就屈 謠言之「源」
前日有份英文報章「爆料」，指稱特首梁振英（CY）在香港大學校務委員會表決副校長任命之前，曾經與港大校長馬斐森閉門會面。之後再有電子傳媒指雙方唔止見過一次，而係至少見過兩、三次。其實CY身兼港大校監，校監與校長不時見吓面、開吓會根本好正常，但港大校友關注組召集人兼教育界立法會議員葉建源，就好似執到寶咁，大肆質疑CY與馬斐森會面係為咗副校任命事宜向港大施壓，炮轟政府公然干預院校自主，變相為前晚嘅反校委會集會催谷人數。不過，CY同港大尋日先後公開澄清，強調兩人喺會面中根本冇講過副校任命問題，明摑葉建源一巴！
CY尋日出席一個公開活動時，被記者追問疑似向馬斐森施壓事件。CY澄清從冇干預過港大副校長任命事宜，並寸爆有關報道好唔具體，話佢與馬斐森喺校委會表決前數周（weeks）會面，但又冇講到係幾個星期之前、十幾個星期之前、定係幾十個星期之前，強調自己身為特首同多間本地大學嘅校監，同包括大學校長在內嘅不同界別人士會面係好正常嘅事。
死撐唔知係咪講真話
港大喺差不多同一時間發表書面聲明，指校委會主席梁智鴻同校長馬斐森與CY嘅會面中，從來未有討論過副校長任命事宜，並暗批有人胡亂揣測同挑起不必要嘅誤會，明顯係講緊身為港大校友嘅葉建源。我哋事後問過葉建源回應，佢仲死撐話唔知CY等人係咪講真話，又話雙方就算冇直接提及副校任命事宜，亦可能講過其他大學內政，進行政治干預同施壓，認為自己毋須為日前嘅嚴重指控澄清致歉。
其實今次並非港大風波中首次有關閉門會議嘅「甩轆」事件，港大學生會會長馮敬恩早前破壞保密協議，大爆校委會閉門會議內容，公開指控多名校委以「冇慰問傷勢」及「冇博士學位」等荒謬理由，否決委任港大前法律學院院長陳文敏做副校長。
馮敬恩厚臉皮拒致歉
不過，其後有多名校委、包括同馮敬恩一樣支持陳文敏升職嘅張祺忠，公開指正馮可能將部分委員嘅發言張冠李戴，或曲解咗佢哋嘅真正意思，有校委更直指馮敬恩可能係因為英文差而引述錯誤。不過，馮敬恩至今都冇為自己「老屈」校委致歉或收回言論，同佢嘅學長葉建源一樣咁厚面皮，十足山草藥「噏得就噏」！