政情：「保港」搞民調 惹電騙疑雲
近日電話騙案猖獗令人心惶惶，市民對來歷不明來電都提高警覺。醫院管理局前日發表聲明，指當局接獲市民查詢，有人以匿名電話收集有關器官捐贈嘅數據，提醒市民小心受騙，並將個案轉交警方跟進。正當各方追查呢啲來歷不明嘅電話調查來源之際，保衛香港運動尋日就發表「一分鐘器官捐贈民調」，莫非佢哋就係今次電騙民調嘅幕後黑手？
收集器官捐贈數據
保衛香港運動原定尋日發表「一分鐘港大副校民調」，但臨時改為「一分鐘器官捐贈民調」，而有關器官捐贈民調係喺九月七日至十四日進行，難免令人聯想到佢哋因為醫管局嘅聲明而將民調提早曝光。不過，發言人傅振中否認，認為同一時間亦可能有其他人做同一民調，所以醫管局要求市民提防嘅唔一定係佢哋，但承認做民調嘅方法可能會惹人誤會。
至於臨時換題目，傅振中話係因為做「副校長民調」時，「甩轆」將陳文敏嘅職位由港大法律學院前院長，寫錯做港大法律學院副院長，為免影響民調嘅準確性，先至決定改為發表「一分鐘器官捐贈民調」。